印尼總統維多多嚟咗香港訪問，佢昨天去咗蠟像館為自己個蠟像揭幕，Kelly留意到佢臨走嗰陣仲特登同劉德華嘅蠟像影相，睇嚟佢都係華仔粉絲啊！

　　昨早維多多去咗山頂凌霄閣香港杜莎夫人蠟像館參觀，佢突然換咗白色襯衫，原來係想着番件一樣嘅衫去襯番自己個蠟像，之後佢就為自己喺全球第一個蠟像揭幕，仲捲起衫袖，擺同一姿勢合照，以示佢為人民打拼喎。佢同太太都好滿意個蠟像，覺得像真度近乎百分百，Kelly覺得好似，幾乎分唔到邊個係蠟像啊！

　　個蠟像可以咁似，蠟像製作團隊居功不少㗎！館方喺舊年十月已經為總統度身，用咗幾個鐘頭，由唔同角度為總統影咗過百張相做參考，又要逐一對比啲細節部份，好似頭髮、眼睛等，再加上總統捐贈件衫比蠟像着，像真度就更加高啦！

　　維多多臨走之前，特登行去同本地影星劉德華嘅蠟像拍照留念，好似好鍾意華仔！小妹問過得成僱傭負責人，佢話劉德華喺印尼都幾出名嘅！